BARTOLOMEO DA BOLOGNA

 

 

 

de Bononia Fr. Bartholomaeus, alias de strada maiori de Bononia, die 24 aprilis 1384 erat adhuc S. Theologiae baccalaureus (cfr. Reg. Dd. 2, f. 14); sed mense februario 1386, iam Theologiae Magister, erat Regens Bononiae, uti constat ex hac dispositione Generalis Bartholomaei Veneti: "Venerabili viro fratri Bartholomaeo de Bononia in sacra theologia Magistro. Cum in nostro Parisiensi conventu et studio more laudabili actenus extiterit observatum, ut penultimo magistratus in dicto conventu senior magister existeret, cuius studii consuetudinibus approbatis debet se nostri conventus Bononiensis universaliter conformare; idcirco cum te contigerit a Regentia Bononiensis cathedrae vacare, tibi statutis apostolicis in eadem Regentia alio succedente te in prefato Bononiensi conventu pro seniori et antiquo magistro ponimus, instituimus" etc. (ibid. f. 76); et eodem anno, mense maio cum Bartholomaeus Venetus Florentiam perrexisset, eum ni fallimur, suum socium fecit. En enim quae legitur in Reg. Dd. 2, f. 99, ad diem 2 augusti an. 1386: "Mandavimus visitatatoribus provinciae Romandiolae fratribus Sygismundo de Forlivio et Paulo de S. Joanne sub pena solutionis de proprio, quatenus infra mensem magistro Bartholomaeo de Bononia quator florenos auri, quos a provincia illa recipere debet de iure ratione regentiae suae in conventu Bononiae pro anno primo post capitulum de Strigonio et illi libras bononienses et 5 solidos pro expensis factis per eumdem de Bononia Florentiam tamquam noster ordinarius socius, debeant integraliter assignasse, vel fratri Augustino de Casali, Studenti Bononiae, pro eo"; et similiter ad diem 4 (ibid, f. 100v): "Mandavimus priori Florentiae, tamquam procuratori provinciae Pisarum, sub poena solutionis de proprio, ut magistro Bartholomaeo de Bononia, nostro socio ordinario, debeat tradere XXXVJ solidos monetae Florentinae, quos exposuit de Florentia Senas, et unum florenum, quem expendidit famulus in ducendo equos dicto magistro de Florentia Bononiam". Die 30 augusti an. 1389 adhuc perseverabat in eodem officio, ut patet ex adnotatis Tridenti illa die in Generalis Registro videlicet: "fecimus vicegerentem in studio Bononiensi mag. Michaelem de Bononia, quousque Magistrum Bartholomaeum de Bononia contingerit (sic) nobiscum esse in generalatus officio, absentem in dicto studio aut conventu ..." (Dd. 3, f. 116); ex quibus apparet fuisse eodem tempore Regentem studii Bononiensis. Tandem, die 30 iulii 1390 Venetiis in eodem Registro (f. 130v) fuit notatum: "Declaravimus venerabilem virum fratrem Bartholomaeum de Bononia, sacre pagine professorem, vocem habere perpetuam [in capitulis provincialibus], eo quod plus quam per triennium interfuit in generalatus officio socius principalis". Fuit insuper an. 1391, 1392 et 1393 provinciae Romandiolae Praefectus, et Prior Rethimensis in Provincia Terrae Sanctae. Posteris reliquit:

1. Richardi Clivinton [kylington apud Tanner, Biblioth. Britannica-Hibernica, Londini, 1748, p. 460] Quaestiones theol. XII. Inc.: "Utrum Deus sit super omnia diligendus". Des.: Explicit [lectura] Clivinton scripta per manus Fratris Bartolomaei de Bononia de Strada Maiori studentis pro tunc padue ordinis fratrum Erem. Sancti Aug., quam scribere complevit Anno domini M.CCC.LXX, prima die mensis februarii in vigilia Purificationis Beatae Virginis. Et sunt cartae totius libri LI. "Sequuntur Quaestiones tres, quae forsan sunt praedicti Bartholomaei, et sunt:

a) Utrum corpora gravia et levia in suis motibus requirant medium;

b) Utrum omne corpus naturale habeat locum naturalem;

c) Utrum tempus sit consequens motus. Haec omnia sunt in cod. A. 985 Bibl. Com. Archigymnasii Bononiensis, membr., ff. 56, binis columnis.

2. Sermones super Epistolas totius anni. Possevino teste in Catalogo Biblioth. S. Augustini de Cremona edito in Appendice, T. III. Apparatus Sacri, extabant ibidem ms.

 

 

 

Referenze:

et Arisi in Cremona Litt. T. II, p. 378; Herrera, T. I., p. 112; Torelli, T. VI, p. 304, n. 35; Ossinger, p. 141 et praesertim Analect. Aug., Vol. V. p. 93-94