BUCCI GABRIELE

 

 

 

Bucci Fr. Gabriel de Carmaniola, qui confundi non debet cum Fratre Gabriele de Naxiis item de Carmaniola: ambo in S. Theol. Magistri et fere eodem tempore viventes. Quapropter corrigendi sunt tum Aloysius Torelli, VII, 395, tum Thomas Herrera, I, p. 307, qui male postremum Gabrielem de Vasis appellaverunt, dum ex documentis a Maiocchi et Casacca, Codex Diplomaticus Ord. S. Aug. Papiae, II, 169, 220 editis, facile perspicitur easdem personas esse diversas et alterum de nobilissima gente de Naxiis fuisse. Is an. 1453 erat in S. Augustini Papiensi coenobio uti simplex religiosus de familia; an. 1459 ibidem Magister studentium; an. 1471 Praeses Capituli provinciae Lombardiae et in eo electus Prior Provincialis; anno insequenti erat Prior conventus S. Augustini Papiae, et iterum an. 1479; ast an. 1480 erat ibidem Prior venerabilis sacrae theologiae doctor Fr. Gabriel de Buciis, qui iam an. 1470 Provinciae Lombardiae Provincialis fuerat, quo munere etiam functus est an. 1487 et 1488. Anno 1489 erat in Atheneo Papiensi professor et die 4 maii 1489 unus extitit e doctoribus Universitatis Papiensis, qui in arduis quaestionibus in facultate theologica baccalaureum Fr. Alexandrum de Vitalibus, eiusdem nostri ordinis examinarunt, eique birretum magistrale rotundum imposuit. In documento ad hoc redactum Gabriel dicitur "in sacra theologia doctor consummatissimus" et hac in occasione sermonem habuit loculentissimum. An. 1491 familiaris erat Marchionis Montis Ferrati Guillelmi Paleologi. Scripsit, iuxta Lanteri, Postr. Saec. Sex Religionis Aug. T. III, p. 389, lingua italica multas et eruditas orationes, quae mss. asservantur in Bibliotheca Regia Taurinensi quas inter ab Andrea Rossotto recensentur:

1. Oratio in morte Ludovici I Marchionis de Saluzzo.

2. Oratio in laudem Bartholomaei consiliarii Ludovici XII Regis Galliaram Neapoli.

3. Oratio in exequiis Ioannis Gavazza. 

 

 

 

Referenze:

Mazzuchelli, Scrittori d'Italia, Vol. II, part. IV, col. 2262, et Ossinger, p. 166