BUTTI CAMILLUS

 

 

 

Butti Fr. Camillus, Comi, ex parentibus christiana pietate conspicuis, die 25 ianuarii an. 1870 primas hausit auras. An. 1884 Eremiticae religioni nomen dedit, aetatis ob defectum tyrocinio nondum idoneus, magnoque animi affectu Neapolis Ordinis habitum induit, atque inibi tirocinii aggressus est iter, quod ad S. Monicae in Urbe emensus est, vota an. 1886 nuncupatus. Prima studiorum in Ordine curricula iucundissime exhausimus simul animorum concordia ex primo iuventutis flore numquam abrupta. Sacrum primum fecit Carpineti die 9 oct. an. 1892, atque simul, cx mandato Prioris Generalis Sebastiani Martinelli, professis nostris in Urbe religiosa disciplina imbuendis ut Magister praefuit. Periculo de more facto, Lector renuntiatus est an. 1893: atque philosophicas, dein etiam theologicas tradidit disciplinas ad S. Monicae primum, nostro postea S. Clarae in conventu prope Ianuam ad an. 1897. Ad Episcopalem sedem Alexandrinam evecto Mag. Iosepho Capecci, parocho magni nominis S. Mariae de Consolatione in urbe Genuensis, in eius locum Camillus noster suffectus est, pleno antea examinatorum suffragio Regentis munere honestatus. S. Theol. Magister an. 1902 nuncupatus, unanimo fere plausu an. 1904 parochorum Genuensium Collegii praeses eligitur. Fuit posthac, non una vice tantum, et Prior illius magni momenti conventus, et praesul suae religiosae Genuensis provinciae, quibus non uno nomine profuit. Quinquies interfuit capitulis generalibus, an. nempe 1895 et 1907 ut discretus suae provinciae; an. 1913 ut Definitor, in quo quidem capitulo renuntiatus fuit Procurator Generalis, quod munus inopinato et quietis amore mense ianuarii 1917 abdicavit; an. 1920, quo eidem commissum fuit munus scribendi litteras amoris atque obsequii totius Ordinis erga Rev.mum. P. Mag. Fr. Thomam Rodriguez, priorem generalem absolutum, et de eodem Ordine magnopere benemeritum; atque ultimo an. 1925 in quo concinnum perpolitum sermonem habuit De priore generali eligendo, typis datum in Analectis August., Vol. XI, p., 153 et seqq. Nunc autem veram eremiticam vitam agens moratur Casciae in Umbria confessarium monialium nostrarum consororum. Scripsit atque edidit:

1. La dottrina di S. Agostino: discorso recitato a Pavia per la traslazione del corpo di S. Agostino l'an. 1900, duabus editionibus.

2. Panegirico di N. Signora della Salute, Genova, Tip. della Gioventù, 1911, in 4.

3. Viaggio in Oriente del P. Camillo Butti Agostiniano, Romae an. 1895, et iterum Romae, Desclèe Lefevre e C.i Edit., 1907.

4. Panegirico di S. Francesca Romana, recitato nella sua Chiesa e nella sua festa, 9 marzo 1915, Bagnorea, Scuola Tipografica.

5. Della prima comunione di Diego Farina. Pensieri ed affetti. Bagnorea, Scuola Tip. 1915, et alia quaedam minoris momenti opuscula.

 

 

Butti Fr. Camillus, (ADDITAMENTA, pag. 68-69) quem in V. I p. 162 memoravimus, in nostro perantiquo Loani conventu, a Liguriae Provincia paulo ante recuperato et instaurato, inopinatam mortem extremis Sacramentis munitus, piissime oppetiit die 28 iunii 1932, eiusdem conventus, paucis ante diebus, Prioris munere absolutus. Praeter ea quae recensuimus P. Butti scripsit etiam:

6. La Regalità di Gesù Cristo nella Teologia del Dottore della Grazia. Conferenza tenuta a Milano nel II Congresso Nazionale della Regalità di Nostro Signore, 5 Giugno 1930.

7. La Gioventù di S. Agostino. Conferenza tenuta a Pavia in occasione del Congresso Lombardo della Gioventù Cattolica Italiana, 21 settembre 1930.

8. La mente di S. Agostino nella Città di Dio. Libr. Edit. Fiorentina. Firenze, La Industria Tipografica, via dei Macci 5 A., 1930, pp. 302 in 12. Biblioteca Agostiniana, N. 18. Opus magni momenti, etiam in exteras linguas translatum, atque a viris vere doctis plurimi factum.

9. Il Dottore della Grazia. Opusculum editum in XV Centenario di S. Agostino CCCCXXX - MCMXXX. Numero Commemorativo - Vita e Pensiero - Fasc. VIII-IX - Agosto-Sett. 1930, pp. 450-508, et alia quaedam ad pietatem excitandam.