BUZI HIERONYMUS

 

 

 

Buzi Fr. Hieronymus e Morrovalle, filius Augustini et Mariae Rastelli, ortum habuit die 23 martii 1720. Habitum Augustinianum Anconae induit, et post novitiatum Romam vocatus, Augustino Antonio Giorgi praeceptore, philosophiam prius ac deinde graecas litteras et theologiam didicit. Lector et Regens renuntiatus, docuit Pisauri, Perusiae, Paduae, Ravennae, Recineti, Arimini et Mediolani. Studiorum cursum Florentiae explevit ac iterum Romam accitus an. 1755 laurea magistrali condecorari promeruit. Ab anno 1764 ad annum 1769 in Auximano seminario theologiam docuit. Fuit iterum Perusiae studiorum Regens et anno 1776 in capitulo Generali electus fuit Picenae Provinciae Prior Provincialis, et Pisauriensis conventus Prior. Dum inibi moraretur ad ditandam illius conventus Bibliothecam mille scutata est elargitus, quae quidem Bibliotheca una cum pretiosissimis manuscriptis B. Petri Iacobi a Pisauro, nec non Fr. Ludovici Zacconi ad Oliverianam migravit. Pisauri eruditissimum litterarum cultorem Annibalem ab Abatibus Olivieri in amicitiam sibi devinxit; familiaritate R.mi Auximani Episcopi D.ni Compagnoni maxime usus est et R.mi P. Francisci Xav. Vazquez protectione gavisus. Venetiis, Veronae, Tergestis, Utini aliisque in locis verbum Dei predicavit, et tandem sui desiderium relinquens sexagenario maior mortuus est. Opera eius sunt:

1. Io. Laurentii Berti Fratris Eremitae Augustiniani Theologi praeclarissimi Librorum XXXVII de Theologicis disciplinis accurata Synopsis, quam ad usum Seminarii Auximatis concinnavit, notis perpetuis, ac novissimis quibusdam dissertationibus auxit et in lucem nunc primum edit Fr. Hieronymus Maria Buzius Augustinianus, in eodem Seminario sacrae Theologiae professor. Accedunt de Locis Theologicis Libri X, qui in auctore desiderantur. Auximi, 1765 ex Typographia Dominici Antonii Quercetti, Tom. IV in 8 regali. Opus pluries impressum, videlicet: Neapoli sumptibus Michaelis Stasi, typis Iosephi de Dominicis, 1769, Vol. 4, in 4, ibidem 1773; postea Romae, Bassani, 1792 et alibi.

2. Per l'onorevole promozione della nobil donna la Sig. Contessa lppolita Mezzalancia di Iesi moglie del fu Conte Orazio Mazzacalli di Recanati all'Ordine insigne della Croce Stellata, o sia delle Dame Crociere fatta da S. M. I. Maria Teresa Regina d'Ungheria e di Boemia, Capitolo di Fabbrizio Guralmo [anagramma significans Hieronymum Buzi] con note estratte fedelmente dai processi autentici in occasione della detta promozione. ms.

3. Theses de Sacris Novi Testamenti scriptoribus, Ravenna, 1750, in 4.

4. Theses de sacris utriusque Testamenti Codicibus, Mediolani, 1753 in 4.

5. Orationes et dissertationes diversae. ms.

 

 

Referenze:

Vecchietti, Biblioteca Picena, Vol. 2, p. 116-119 et Lanteri, Postr. Saec. Sex., Vol. III, p. 350