CAIAZZO IOSEPH

 

 

 

Caiazzo Fr. Ioseph. Hydruntinus Archiepiscopus, ortum habuit Neapoli die 14 maji 1805 ex Alojsio et Fortunata Pecoraro; ac anno 1825, die 30 septembris in maiori S. Augustini patrio coenobio nostrae Eremitanae familiae suum nomen dedit. Post solemnia vota nuncupata per omnes studiorum gradus ad magistralem lauream pervenit, atque pluries praefati coenobii, laudabiliter Prioratum gessit. Cum omnibus illius praesertim ecclesiastica doctrina nota esset, obtinuit etiam theologicam doctoralem lauream Neapolitanae Universitatis, meruitque illius urbis theologorum Collegio adnumerari, quem subinde honorem Florentinum quoque theologorum Collegium illi attribuit. Anno 1850 cum totam Neapolitanam provinciam magno cum zelo administraret, a R.mo P. Mag. Iosepho Palermo, tunc Vic. Generali, Romam accersitur Procuratoris Generalis munus exercere. Hunc locum ea qua decet dignitate tenuit usque ad an. 1859, quo temporis intervallo, praesertim cum R.mus P. Mag. Vic. gen. Paulus Micallef in Mexicum navigasset, totum Augustinianum Ordinem Commissarii Generalis nomine gubernavit. Vir ingenti doctrina ac praecipue ecclesiastica vere refertus, aliis praeterea honoribus nobilitatus fuit, quippe qui consultor estitit Romanae S. Congregationis Indicis.

Examinator Cleri Neapolitani atque Nolani nec non socius academiae in civitate Nolana, et demum, praeter opinionem suam, a Summo Pontifice Pio IX die 22 augusti 1872 Hydruntinus Archiepiscopus renuntiatus fuit, ac Romae in tempio S. P. Augustini ab E.mo Card. Patrizi, adsistentibus DD. Alexandro, Arch. Thessalonicensi et nostrate Episcopo Porphyriensi Francisco Marinelli die 1 ianuarii 1873 consecratus. In Pastorali novo officio sanctissime se gessit, suaque prudentia, amore iustitiae, atque mansuetudine omnium animos sibi devinxit. Tandem a laboribus fractus, susceptis Ecclesiae sacramentis, ad vitam sine termino die 25 iulii 1883 placidissime transivit. Ita fere Reg. R.mi Neno N. 264 p. 171 - 2, et Lanteri in Erem. Sacr. Aug. P. I, p. 20-91. Edita ab ipso fuit: 1. Epistola Pastoralis ad Clerum et Populum Archidioecesis Hydruntinae. Romae, Tipographia Editr. Romana, 1872 in fol.