CAVUZI AUGUSTINUS

 

 

 

Cavuzi Fr. Augustinus, Cremonensis, quem Herrera, T. I, p. 53 et Torelli, T. VI, p. 677, de Cautiis; Ossinger, p. 225 de Cavuciis; Lanteri, Postr. Saec. Sex R. A., T. III, p. 383 de Caruciis, et Codex Vat. Capp. 3, f. 125, Camicii vocant, fuit insignis verbi Dei declamator, S. Theologiae magister, et hac in scientia praestantissimus. In Registris Ordinis reperitur an. 1431 et an. 1432 illum Magistrum Regentem fuisse conventus Genuensis, postea scribam sive secretarium Prioris Generalis, et die 26 iulii 1434 in illius favorem datam fuisse sequentem dispositionem: "Declaravimus per litteras M. Augustinum de Cremona datas, Deffinitionem in Capitulo Mantuano factam, quod magistri qui triennio non legerunt careant subsidio provinciarum suarum, ad ipsum minime extendi, qui occupatus in negotiis Ordinis a R.mo P. Generali, cuius erat scriba, suum magisterium accelerare coactus est. Quare volumus et mandamus ut ipse habeat quod ceteris M. a provincia dari consuevit. (Reg. Dd. f. 11, et Analecta Aug. Vol. VI, p. 345). An. 1438 erat Vicarius et officialis Episcopi Cremonensis Venturini de Marnis. Non constat quando obierit. Sequentia ab eo relicta fuere:

1. Sermones praedicabiles M. Augustini de Cremona Ordinis Heremitarum S. Aug., qui mss. asservabantur in Bibliotheca conventus S. Augustini Cremonae, uti testatur Possevinus in Apparatu Sacro, T. III in Appendice, qua refert catalogum eiusdem Bibliothecae.

2. Commentarium in Orationem Dominicam et Salutationem Angelicam.

3. In Bibl. Vat. Cap., cod. 3, saec. XV, inter ff. 18b, 23b et 125-128, habentur duo Sermones eiusdem, et sunt: Sermo in coena Domini habitus Cremonae a M. Augustino Cavutio Ordinis heremitarum Sancti Augustini. 1447. Inc.: "De summo omniumque dignissimo..."; et Oratio in funere Francisci Sfortiae, quae inc.: "Sentio id mihi hoc loco accidere...". In fine legitur: "Fratris Augustini Camicii (?) sacre Theologie professoris Cremone habita XI septembris MCCCCLXVII". 

 

 

 

Referenze:

Arisi, Cremona Lit. T. I, 243 atque alii