CHIAVARI FABIANUS

 

 

 

Chiavari sive Clavarius Fr. Fabianus, S. T. M., Genuensis, Congregationis Baptistinorum Ordinis Erem. S. Augustini proles illustris, vir extitit integerrimus, observantiae amator, et scriptis tractatibus cognitus. In primo vernantis adolescentiae flore an. 1514 ad studium Perusinum mittitur, et an. 1521 S. T. Magister renuntiatur. An. 1522 erat Regens coenobii Patavini. Suae Congregationis Vicarium egit an. 1525, 1539 et 1552. An. 1543 interfuit Capitulo Generali Romae celebrato uti Definitor Provinciae Bavariae, ac inibi constituitur una cum Magistris Francisco Gambasiensi et Silvestro Vicentino in Italia nec non Petro Guerente in Gallia et Sancto Thoma Villanovano in Hispania ad revisendas examinandasque antiquas Ordinis Constitutiones. A Generali Seripando Provinciae Pisanae et Ilicetanae Congr. Praesul an. 1546 summis cum laudibus constituitur, et in hac qualitate an. 1547 Capitulo Generali Recinetensi interfuit, in quo quidem capitulo Provinciae Lombardiae Provincialis Prior constituitur. An. 1560 a Christophoro Patavino plurium Provinciarum Vicarius Generalis designatur. Die 24 iunii 1554 Generalis Procurator totius Ordinis instituitur, et in Capitulo Generali an. 1559 confirmatur. Sed quietis amator, et propriae saluti spirituali attentius incumbere studens, assiduis praecibus absolvi a munere an. 1561 extorsit potius quam impetravit. Reversus in patriam ad finem an. 1562 a nobilibus Genuensibus familiae Auriae, ecclesiae illius patronatus dominis, Abbas S. Matthaei eligitur, et Prior Generalis die 25 ianuarii an. 1563, ut Abbatiam sive Prioratum, olim S. Benedicti Ordinis, acceptaret, indulget. Ibi die 2 aprilis an. 1569 in bona senectute optimae vitae finem imposuit, et cadaver in ecclesia S. Matthaei traditur sepulturae. Haec ex Herrera, T. I., p. 240. Eius opera sunt:

1. Tractatus de Cambiis. Romae, apud Antonium Bladum, 1555 in 4. Iterum Romae, an. 1566. Deinde Genuae apud Bellonum an. 1568 et an. 1596 in 4; ac in Tractatibus iussu Gregorii XV Venetiis editis, 1584 in fol. T. VI, p. 410 habetur inclusus cum hac epigraphe: Tractatus de Cambiis absolutissimi Theologi Fabiani Genuensis. Item Bononiae an. 1671, vol. in 4, una cum tractatibus de usuris et restitutionibus nostratum fratrum Gerardi Senensis et Aug. Vanci Ariminensis.

2. Tractatus eiusdem de Cambio Lugdunensi, quem Gandolfo, p. 119, existimat idem cum supranominato, quique ms. estabat, ait, in Bibliotheca Card. Sirleti Romae. Extat hic tractatus italice, hoc tit.: Trattato di Cambio di Lione o di Besansone, ex versione Antonii M. Venusti editus in Compendio di quelle cose, le quali..., a' Mercanti appartengono. Milano, 1561.

3. Orationes duae habitae coram Sanctissimo Paulo IV, cum esset Generalis Procurator: prima Dominica III Adventus 1555; secunda Dominica III Quadragesimae 1556, editae Romae apud Blandum iisdem annis in 4.

4. Purgavit insuper Magistri Gerardi Senensis Tractatum de usuris et restitutionibus, et primo edidit Romae apud Antonium Bladum an. 1556 in 4.

5. Fundatissimi B. Aegidii Columnii aliqua opuscula correxit et typis tradidit Romae apud eumdem Bladum, an. 1555 in fol. Reliquit tandem plura manuscripta, quae, non adhibita necessaria diligentia, male periere. 

 

 

 

Referenze:

Ita Gandolphus p. 117; Pamphilus, f. 121; Gratianus, p. 67; Herrera T. I, p. 240; Elssius, p. 189; Torelli, T. VIII, p. 391; Moreri, Dictionaire historique, T. II, p. 384, et Iöcher, T. I, col. 1937; H. Hurter, Nomencl. Lit. (1907), T. III, col. 132