de CREMONA NICOLAUS

 

 

 

de Cremona Fr. Nicolaus, sive Nicolinus in capitulo generali Astensi an. 1419 (confirmante postea Priore Generali die 15 maii an. 1420) ad Magisterium in universitate et studio Patavino definitus fuit pro primo loco, ante Donatum Mediolanensem; a B. Augustino Romano, iam licentiatus, die 22 maii 1421 destinatur Regens studii Patavini pro an. 1421 cum provisione duodecim ducatorum iuxta reductionem Prioris Generalis M. Petri de Vena; et die 1 septembris, iam Magister, in Regentia Patavina pro an. 1422 confirmatur. Die 5 iunii ei assignatur camera olim M. Simonis de Cremona. Die 9 octobris an. 1422 et die 17 iunii 1435 Vicarius Generalis Conventus Cremonensis instituitur; et die 12 iulii 1423 et per totum insequentem annum erat Regens Patavinus. Die 2 iulii 1425 Capitulo provinciae Lombardiae Dominica secunda octobris an. 1426 celebrando, et die 5 Februarii an. 1432 pro Capitulo in conventu S. Martini de Alexandria an. 1433 congregando, primo loco Praeses datur. Fuit postea ab an. scilicet 1426 et ad lecturam logicae ac philosophiae moralis in Universitate Ticinensi deputatus, et coenobii Papiensis Regens, et an. 1430 Provincialis Lombardiae. Hoc tamen munus in manibus Gerardi de Arimino an. 1431 renunciavit; et ille, acceptata renunciatione, M. Albertum de Crispis de Papia Lombardiae Provincialem praescripsit. Die 16 augusti an. 1436 erat Prior coenobii Placentini; et die 4 novembris a Priore Generali confirmatur Provincialis Lombardiae, electus Placentiae in die B. Lucae Evangelistae. Neque ulla amplius in Regestis Nicolai mentio.

De eo Iac. Philippus Bergomensis in Supplemento Supplementi, libr. VI, fol. 123, de urbe Cremona loquens, sic ait: "Habuit et Guillelmum Episcopum Novariensem, et Nicolinum Theologum insignem, qui multa memoratu digna composuere" et lib. XVI, fol. 425, sub an. 1482 agens de Baptista Piasio Cremonensi insigni astronomo, qui prope nonagenanius Kal. februarii an. 1492 levi morbo decessit, et in templo D. Augustini sepeliri voluit, haec subdit: "Nicolaus Cremonensis theologus et orator consummatissimus Ordinis nostri in Logica huic praeceptor fuit". Interfuit Concilio Basileensi, ut tradidit Hieronymus Roman in suis codicibus ex defitione ultima Capituli Mantuani an. 1434 celebrati, ex qua constat praefato Concilio interfuisse magistros Georgium de Valle Speciosa Provincialem Bavariae, Henricum Zolter, Albertum Crispi Provincialem Lombardiae et Nicolaum de Cremona. Ex Herrera, T. II, p. 193 fere iisdem verbis. Reliquit mss. Tractatum de communicatione idiomatum in Christo et Sermones Praedicabiles, qui custodiebantur in olim nostra Bibliotheca Cremonensi. 

 

 

 

Referenze:

et Arisi, T. II, p. 231; Torelli, Secoli Agost., Vol. VI, p. 650; Ossinger, p. 274, et Maiocchi Casacca, Codex Diplomaticus cit. Vol. II, p. 44