DANTINI FRANCISCUS

 

 

 

Dantini Fr. Franciscus, (ADDITAMENTA, pag. 71-72) Recinetensis, S. Teol. Mag., vir integerrima vita et multa doctrina insignis, nostrates docuit Perusiae, Neapoli, Patavii, et Bononiae ab an. 1570. Magistralem lauream adeptus an. 1571 Piceno praeficitur. In Comitiis Generalibus, Bononiae habitis die 13 maii an. 1581, universi Ordinis regimen obtinuit. Verum vix acceptum, munus statim dimisit, nam Recinetum profectus, ibidem die 10 iunii praefati anni 1581 ad suae mortalis vitae terminum pervenit. Eo rnortuo, habenas totius Ordinis suscepit Mag. Augustinus Fivizanius, ut Vic. Gen. per Breve apostolicum die 18 iunii eiusdem anni.

Fivizanius statim Priorem nominavit conventus Recinetensis Mag. Gabrielem Fulginatensem ut Recinetum quamcitissime se conferret et inibi res et scripta defuncti Generalis diligenter requireret et curam haberet. Idem praeceptum fecit Provinciali Marchiae Anconitanae, ut nempe bona R.mi P. Generalis defuncti, tam pecunias quam etiam libros et scripta omnia custodienda curaret. Postea iterum iterumque scripsit Priori Recinetensi atque eidem mandavit ut quamprimum scripta et alia Rev.mi P. Generalis defuncti ibi existentia Romam mitteret. Istis mandatis certe Gabriel obedivit, sed de qua re tractabant illa scripta et ubinam nunc reperiuntur? Suspicor illa contineri in uno vel pluribus ex codicibus saec. XVI Bibliothecae Angelicae Urbis sive de theologicis disciplinis, sive de philosophicis, qui inibi anonyma asservantur.

 

 

 

Referenze:

Herrera, T. I, p. 242; Elsius, p. 209, et Lanteri, Eremi Sacrae Aug., Part. I, p. 309, nec non Analecta Aug., Vol. X, p. 258-9