DATO IOHANNES

 

 

 

Dato Fr. Ioannes e Foro Cornelii, vulgo de Imola dictus, de quo Coriolanus in sua Chronica haec adiecit: "Hic profecto vas scientiarum erat, acerrimus disputator, memoriosus valde, Aegidianae disciplinae defensor, parum facundus, subtilis multum et copiosus. Moritur satis iuvenis, et Imolensis Episcopus electus". Inter Dispositiones datas in Capitulo generali de Appamiis anno 1465, una habetur qua quidam fr. Ioannes Albus de Imola in conventu Ariminensi constituitur biblicus honoris, forsan iste idem est ac Ioannes Dathus, qui certe hoc tempore vivebat, cum enim a Pamphilo an. 1460, et Crusenio an. 1459 floruisse affirmetur. Antonius Mazzoni in hist. Episcoporum Imolensium, Faventiae, 1710, p. 280, haec de nostrate Ioanne seribit: "Vita functo Antonio eligitur ad Imolensem Cathedram a Paulo II (c. 1464, m. 1471) Ioannes Dathus Imolensis Ordinis Eremitarum S. Augustini patrii sui coenobi olim alumnus, quem eximia virtus et sapientia inter praeclaros theologos ac scriptores illius sacri Instituti celebrem reddidit, sed eius immatura mors illius inaugurationi obstitit, fuit enim tantum electus, atque ante consecrationem praereptus". Videtur decessisse, concludit Lanteri, Erem. S. Augustini,. T. I., p. 84, circa an. 1470.  Eius opera sunt:

1. Liber de attributis divinis. Extabat ms. in nostra Biblioth. Ratisbonae, et nuncupatur: Ven. in Christo D. Ioanni Esfordensi, Artium et decretorum Doctori canonico Cirinensi.

2. Libri duo in priora Aristotelis.

3. Libri duo in posteriora eiusdem.

4. Liber de potentiis animae.

5. Libri S. P. Augustini contra Faustum, Crescentium et de Trinitate in conclusiones redacti.

 

 

 

Referenze:

Laudatur ab Herrera, T. I, p. 434, Gratiano, p. 110, Gandolpho, p. 210; Ossinger, p. 288, et Cappelletti, T. II. p. 265, nec non a Gesnero, p. 360, Frisio, p. 428 et Fabricio, T. I, p. 432