DE ANGELIS IOSEPH

 

 

 

De Angelis Fr. Ioseph, Isclanus, filius conventus S. Mariae oppidi v. Laccameno, ortum habuit an. 1803, et an. 17 aetatis suae expleto, Ordinem nostrum ingreditur. Anno 1826 Sacerdos effectus, in studio promotus fuit ad cursoratum. Lector an. 1829 renuntiatus, mittitur Aquilam, deinc Perusiam, et an. 1831 Viterbium. Die 3 maii 1832 ad Regentiam examinatus atque approbatus, iterum Aquilam mittitur. In oppido v. Cagnano an. 1833 S. Quadragesimam praedicavit, expletoque Regentis munere, S. Theol. Magisterii laurea fuit decoratus. Inter vivos adhuc versabatur an. 1860. Scripsit typisque mandavit:

1. Pensiero sul Dominio temporale del Papa, absque loci, anni et editoris adnotatione.

2. Dissertatione sull'immegliamento della società, prodotto unicamente dalla Religione cristiana, letta nella tornata Teologica del 12 dicembre 1851. Opusculum in 4° magno, pp. 16, de quo desideratur etiam impressor, tempus et locus.