DE GENESTANO PAULUS o DE SCLAVIS

 

 

 

de Genestano Fr. Paulus, S. Theol. Mag.. memorati Mariani nepos, praeceptor fuit Seripandi, quem iuvenem humaniores, graecas et latinas litteras docuit (Cfr. Torelli, Sec. Agost., T. VII, p. 532). Is circa annum 1471 ortum habuit, Augustinianam erem. regulam in patrio coenobio professus est, et an. 1491, subdiaconatus ordinem adeptus, Florentinum ad S. Gallum incolebat conventum. An. 1497 Romam accersitur, ac tribus post annis Paduam mittitur, qua, dum studentium magistri fungeretur munere, primum Lector, deinc an. 1503 Bacc., ac tandem, an. 1504 S. Theol. Doctor est renuntiatus. In suam Provinciam cum remeasset, prius Genestanensis conventus fit Prior; postea a Romana Provincia, tamquam Discretus mittitur ad Capit. Generale an. 1505 Perusiae habitum una cum Mariano de Cavis, Provinciale, et Aegidio de Viterbio, Definitore, eius amicisimo. Die 22 aprilis 1513 unanimi Fratrum consensu Praesul suae Provinciae evasit electus, eo in munere manens usque ad an. 1506; an. 1520 eiusdem Provinciae nominatus fuit Generalis Vicarius, atque mense ian. 1526 una cum eius fratre Hieronymo rogavit Generalem Gabrielem Venetum ut Lectores efficeret Fr. Aegidium Coranum et Fr. Alphosum Aquapendentanum, quod facile obtinuit; sed paulo post moritur. Dicitur a Panvinio, Commentariorum rerum nostri Ordinis, Romae, 1547, f. 50: "et linguarum peritia, et variis scientiis apprime ornatus". In Alphabeto Aug. vero P. Thom. Herrera, T. II, p. 283, haec de illo inter alia leguntur: "Inter caeteros suos labores, Pauli Veneti Summam Phylosophiae naturalis, librariorum incuriam vitiosam, corruptam: puram incorruptamque, typographis (an. 1504) excudendam tradidit: et Commentaria Gregorii Ariminensis in primum et secundum Sententiarum Aegidio Viterbiensi dicavit, Patavii Kal. Aprilis anno 1502, et luci suae integritati restituit Venetiis Nonis Aprilis an. 1503 sumptu et impensis Octaviani Scoti civis Modoetiensis, praelo vero Presbyteri Boneti de Lucatellis Bergomensis". Haec omnia ex Ordinis Regesta illius aevi.

 

 

 

Referenze:

A Pamphilo, Chronica Ordinis, p. 101, dicitur de familia De Sclavis.