EUGUBIUS IACOBUS

 

 

 

de Eugubio Fr. Iacobus, vir scientia et vitae probitate insignis circa an. 1390 patriam et Ordinem Augustinianum suis virtutibus decoravit. Is in Registris Ordinis sub die 22 iunii an. 1388 a Priore Generali ad Magisterium licentiatur his verbis: "Cum nostra sacra Religio in Generali Capitulo nuper Imolae celebrato de tua praecellenti valetudine, tam in scientia, quam in vita, fama praeclara iam quasi ubilibet divulgata, testimonium susceperit fidedignum; volens ut aliqualiter consequaris honoris praemium per virtutem, ac ut cum apice magistrali in agro scholastico tuae Religioni uberiores fructus afferas, cum sanctae conversationis praeeminentia exemplari, te diffinivit, et ordinavit ad lecturam sententiarum et Bibliae in Universitate ac studio et conventu nostro Paduae pro primo loco, in annoque praesenti, pro gradu Magisterii finaliter consequendi...". Haec ex Herrera, T. I, p. 465. A Lanteri autem in Addimentis ad Crusenii Monasticon (Vallisoleti, 1890), p. 379, Iacobus dicitur: "in Sanctorum Patrum Lectione summopere versatus, atque subtili ingenio praeditus, ob theologicam doctrinam semper in magno pretio habitus". Non constat quando ex hac vita migraverit. Ab eo habentur:

1. Quaestiones in II et III Sententiarum librum Paduae an. 1389 disputatae in nostra Bibliotheca Bononiensi olim asservatae.

2. Codex variis tractatibus refertus, qui sub. n. 827 asservatur Romae in Bibliotheca Angelica, et ad calcem unius ex illis sic habetur: Explicit collatio facta Paduae, Domino Iacobo de Vermis de Verona nostri Ordinis praecipuo zelatore, tempore quo interfuit pro Comite virtutum Paduae, per Baccalaureum Fr. Iacobum de Eugubio ibidem legens sententias Ordinis Beatissimi P. N. Augustini.

 

 

 

Referenze:

Gratianus, p. 104; Iacobilli, Bibl. Umbriae, 146; Torelli, Secoli Agost., T. VI, p. 286, n. 21; Ossinger, p. 320 et Lanteri, Postr. Saec. Sex R. A., T. I, p. 371