FABI CAROLUS

 

 

 

Fabi Fr. Carolus Nic. Maria, Episcopus Bobiensis, Vitalianae die 8 oct. an. 1721 ortus, Augustinianam tunicam induit Tolentini die 23 maii 1738. Tyrocinio peracto, studiorum causa Romam ad suae Insubricae Congregationis coenobium S. Mariae de Populo missus fuit, ibique philosophiae et theologiae cursum octo annorum spatio complevit. Inde an. 1749 Lector renuntiatus, plura in disputationibus tum publicis tum privatis Romae argumenta dedit suae profundae doctrinae et eruditionis, quo nomine saepe in diariis romanis illius temporis celebratur. Quare cooptari meruit inter Arcadiae Accademicos, Pontificiae Accademiae Conciliorum, inter socios atque inter Consultores S. Congr. Indicis.

Annis viginti Romae nostrates docuit; postea in Sardiniam navigavit, ubi in publico Calaritano lyceo philosophiam professus fuit, quam cathedram dimisit mense novembris an. 1770 profecturus ad regium Taurinense Athenaeum theologiam moralem profiteri. A Pio VI Bobii episcopus electus, consecrationem die 23 septembris 1781 accepit in templo S. Mariae de populo per manus E.mi Card. Gerdil. Ad suam Dioecesim profectus indefessus se ostendit in tradenda suis clericis theologia morali, quam ipsemet erudite scripserat. Optimi ac vigilantissimi Pastoris exercuit munera: obiit Bobii die 16 martii 1803, ibique in cathedrali templo sepultus est. Scripsit:

1. Dissertationes valde doctas, quas habuit coram Summo Pontifice cum Accademici et Consultoris officio fungeretur, mss.

2. Acta sui officii Pastoralis.

3. Theologiam Moralem ad usum alumnorum sui Episcopalis Seminarii, quae an tipys commissa fuerit necne incompertum nobis est. 

 

 

 

Referenze:

Lanteri, Eremi Sacrae Aug., Part. I, p. 40 et Lopez, in Monastici Augustiniani Crusenii Additamentis, T. III, p. 82