FILIPPINI AURELIUS

 

 

 

Filippini Fr. Aurelius de Roccha Contrata, nunc Arcevia, uti Lanteri, Postr. Saec. Sex, Tom. II, p. 398 ex Iacobilli et Vecchietti in Bibliotheca Picena, Vol. IV, p. 166 inscribit; non vero Philipputius ut in actis Concilii Tridentini vocatur (Cfr. Calenzio, Saggio di Storia del Concilio Generale di Trento sotto Paolo III. Roma, 1869 p. 376) et etiam Philippinus. Vir fuit pietate et eruditione conspicuus, philosophus et theologus insignis. Vixit saec. XVI, carissimus Hieronymo Seripando qui eum plurimi fecit. Cum Marchiae Tarvisinae esset Prior Provincialis mandatum habuit S. Concilio Tridentino, Bononiae convocato, interessendi. In eiusdem II et VI sessione votum dixit de duplici iustitia, de certitudine gratiae, de justificatione, de peccato originali, ac de Sacramentis in genere. Cum plausu praedicavit in pluribus Italiae et Germaniae civitatibus et praesertim Florentiae anno 1556, et Marsici in Regno Neapolitano anno 1571. Non constat quando ad meliorem vitam transiverit; forsan senex circa initium saec. XVII in patria sua. Scripsit quae sequuntur:

1. Diario. Asservabatur ms. in 8° in Bibliotheca Classense, Ravennae.

2. Orazioni Sacre, una cum aliquibus carminibus vulgo Sonetti.

3. Vita della B. Rita da Cascia, Roma, 1612, in 4°.

4. Giardino odorifero delle grazie, indulgenze e privilegi concessi da' Sommi Pontefici e da N. S. Papa Clemente VIII confermati alla Compagnia dei cinturati di S. Agostino di Cesena ... In Cesena, per Francesco Raverio, 1603, in 12°.

 

 

 

Referenze:

Praeter citatos cfr. etiam Crescimbeni, Storia della volgar poesia, Tom. V, pag. 255, ubi confunditur cum fratre Aurelio de Corinaldo e familia Finizi eiusdem nostri Instituti; Herrera, in Alphabeto Augustiniano, Lit. A. de Scriptoribus; Giacobilli, Cathal. Script. Provinciae Umbriae, p. 58, et Lopez in Additament. ad Crusenii monasticon, pagina 502