FINACCI AUGUSTINUS

 

 

 

Finacci Fr. Augustinus de Alto Pascio in Hetruria, quem alii putant de Monte S. Sabini, vir fuit doctissimus ac concionator celeberrimus. Anno 1343, die 21 martii a Clemente VI Narniensi in Umbria Ecclesiae praeficitur. Aegidii Card. Albornotii Innocentii VI Avenione degentis per Italiam legati, iam episcopali infula redimitus, in collegendis subsidiis ecclesiasticis praecipuus minister fuit. Anno 1357, uti narrat Scipio Ammiratus in histor. Florentina libr. 11, ad annum 1357, Florentiam ad petendum auxilium contra Fori Livii Capitaneum missus fuit, ibique contra illum eo spiritu ardore Cruciatam praedicavit, ut triginta florenorum aureorum millia collegerit. "Il legato (scribit G. Capponi in sua St. della Repubbl. di Firenze (Firenze 1875), T. I. p. 260, ex Chron. Matt. Villani, lib. VII, c. 84), contro ad essi (nempe in milites Comitis Landi) bandiva la croce per tutta l'Italia, ed in Firenze mandò un Vescovo di Narni a predicare l'indulgenza con grande solennità; dove fu tanto il concorso, che non poteva egli resistere a ricevere le offerte ed a porre le mani in capo, e in pochi giorni raccolse da trentamila fiorini d'oro, i più dalle donne e dalla gente minuta". Id nimirum evenit, quia Augustinus Episcopus nomine praefati Legati, Florentinam civitatem, excomunicationis vinculo antea irretitam, solemniter absolverat.

Vixit certe usque ad annum 1367, quo habetur illius immediatus successor. Iulius Negri, S. I., Istoria degli Scritt. Fiorentini, Ferrara 1722 p. 6, a quo dicitur cognomento Finazzi, haec de illo habet: "Morì nella sua Chiesa l'anno del Signore 1367 lasciando da lui composti molti volumi di prediche manoscritte". Illi quoque adscribendam esse puto Expositionem in Psalmos, quae sub nomine tantum cuiusdam Fratris Augustini de ... continetur in cod. 444 (D. 5, 13) Biblioth. Angelicae Urbis, membr. in 8°, saec. XIV, ff. 116, binis coll., et inc.: "Exurge ... unde consurgit diluculo ...". E titulo, qui vetustate evanuit, supersunt haec verba: Sermones pulcri super ... et sunt fratris Augustini de ...". 

 

 

 

Referenze:

Herrera, T. I, p. 38; Elssius, pagina 97; Ughellus, T. I, col. 1018, n. 36; Moroni, Vol. 47, p. 233; Lanteri, Eremi Sacr. Aug., Part. I, p. 118, a quo fere haec omnia hausimus, et Ossinger, p. 338