FIVIZZANENSIS AUGUSTINUS

 

 

 

Fivizanensis Fr. Augustinus, Hetruscus, Doctor Parisiensis, ac vir, ut scribit Ioseph Pamphilus (Chronica Ord. Fratrum Erem. S. Aug., Romae, 1581, f. 105), singularis ingenii, tantae auctoritatis et gratiae apud Aegidium (Viterbiensem) Generalem extitit ut eidem negotia Ordinis in Gallia praesertim difficillima super omnia commiserit". Cuius naturae erant ista negotia nos latet; haec tantum scimus: "Die 27 martii 1519. Ad Provincialem Franciae indulgentias et commissiones mittimus, ait Aegidius in suis Regestis, hortantes tam Provincialem quam magistrum Augustinum Fivizanensem, ut de consensu Regio obtinendo maxime laborarent, illumque ad alias Franciae provincias transmittat". (Cfr. Analecta Aug., Vol. IX, p. 211). Sed ipse iam interfuerat Capitulo Gener. Neapoli an. 1507 celebrato, ac inibi inter Regentes disputantes, ut ait Torelli, Secoli Agostiniani, T. VII, p. 560, "non fu meno lodato per la sua somma modestia; che per la sua alta dottrina". E Gallia in Italiam reversus, an. 1526, uti definitor suae Pisarum Provinciae, una cum Mag. Andrea Fivizano Provinciali, interfuit Capitulo generali Tarvisii celebrato (Ibid., p. 43).

"Aiunt, subiungit idem Pamphilus, hunc aliqua digna immortalitati a se edita commendasse, sed usque modo nihil vidi praeter sermones varios sapientissimis sententiis ornatos". Apud vero romanum bibliopolam Samonati. (Cfr. eius Catalogum 56, n. 471) sequens opus venum ivit:

1. Expositiones D. Thomae Aquin. Ord. Praed. in tres Psalmos vulgo tres primos nocturnos cura Fr. Augustini de Fivizano Ord. Heremitarum in coenobio S. Stephani regentis. Venetiis, Tip. de Luere 1501, in fol.

2. Commentaria super quatuor libros metheororum Aristotelis, cum textu eiusdem, D.ni Caietani de Thenis Vicentini artium et medicinae doctoris clarissimi, diligenter emendata per fratrem Augustinum de Fivizano Artium et Theologiae doctorem Ordinis fratrum heremitarum Sancti Augustini. Venetiis, Bonectus Locatellus, an. 1496 in fol. 

 

 

 

Referenze:

Gesarut Katalog. der Wiegendrucke, n. 2422. Extat in Bibl. de Dresden, L. B.