GARASSI CAJETANUS

 

 

 

Garassi Fr. Cajetanus ex honestis parentibus ortum habuit Catanae in Sicilia die 10 novembris 1727. Ab adolescentia Ordinem Eremitanum amplexatus, apud eumdem per consuetos gradus evasit S. Theologiae Magister, iuris etiam canonici scitissimus. Pluries fuit Catanae Prior, Siciliae Provincialis, nec non Ordinis generalis Assistens. Catanae cum degeret rector fuit nobilissimi Collegii Cutelli, professor Theologiae Dogmaticae, et juris canonici in Universitate Catanensi, nec non Theologiae professor in Seminario, et Cleri examinator. Eximii oratoris laude cum floreret, in praecipuis Italiae urbibus, ac praesertim ad aulam Ferdinandi I conciones habuit. An. 1792, die 18 iunii, aetatis suae 65 eligitur Archiepiscopus Messanae in Sicilia et eodem anno die 24 eiusdem mensis Romae in templo S. Augustini consecrationem accepit. Magno cum zelo et diligentia concreditam sibi Ecclesiam gubernavit, ac prae caeteris eius egregiis virtutibus illius celebratur insignis misericordia in pauperes, quos etiam praeter quotidianas elargitiones ad spiritualia exercitia saepe colligebat, illos interea suis sumptibus sustentam, uno eodemque tempore providum eos de spirituali et corporali alimonia. Cum duo insignia monasteria, unum nempe sub titulo de Spiritu Sancto, et alterum de Conceptione ob adversas vicissitudines eo devenissent, ut prae inopia claudi oporteret, munificentissimus Archiepiscopus illa ne perirent suo aere sustinuit, atque praeterea ecclesiae cathedralis prae vetustate collabentibus tectis resarciendis septem scutorum millia impendit. Sua doctrina, sanctimonia, atque rerum agendarum dexteritate benevolentiam, atque existimationem sibi conciliavit Magni Melitentium Equitum Magistri, qui illum perinsignis sui equestris Ordinis Cruce decoravit. Transivit ad recipiendam a Domino mercedem virtutum suarum die 16 februari an. 1817 aetatis suae 89, et episcopalis regiminis 25. Ita Lanteri in Erem. Sacr., VoI. I, p. 112. Reliquit varias doctas atque elegantes orationes funebres et panegyricas tipis editas, inter quas:

1. Premure di Sant'Agata Verg. e Martire Catanese a favore della patria. Catania, 1760, in 4°.

2. Orazione estemporanea nella morte del Rev.do P. D. Vito M. Amico Statella Abbate Cassinese, Catania, 1762, in 4°.

3. Per la morte del P. Maestro Girolamo Gemellari Ord. Praed. Orazione estemporanea, Catania, 1762, in 4°.

4. Theses Theol. de creatione Mundi et hominis et de Paradiso. Cataniae, 1760, in 8°.