GAVARDI FRIDERICUS

 

 

 

Gavardi Fr. Fridericus Nic., Mediolanensis, S. Theol. Doctor, atque nostratis Henrici Noris praeceptor, inter philosophos atque theologos, qui nostrum fundatissimum Doctorem Aegidium Columnam explanarunt, facile princeps, die 15 febr. 1640 ortum habuit. Die 4 martii 1659 ordini Augustiniano suum dedit nomem, et an. 1661, iam theologiae studens, erat Papiae pro studentium magister. Inde an. 1662 remissus fuit Mediolanum ubi per tres annos in conventu S. Marci commoratus est; postea Bononiam missus fuit renuntiatus Lector. An. 1667 fit Caesenae Regens, et an. 1674, die 31 maii, S. Theol. Mag. in coenobio Perusino. In Capitulo gen. an. 1673, quo, Prior Generalis electus fuit P. M. Nicolaus Oliva, pro defunctis Ordinis orationem habuit; in Capitulo etiam gen. an. 1679, die 28 maii, theses theol. pro Collegio Perusino E.mo Card.li Columnae nuncupatas propugnavit P. Lector Clemens Avvolta, Cornetanus, sub assistentia R. P. M. Fr. Friderici Nic. Gavardi praefati Collegii Regentis: uterque autem optime se gessit, et P. Regens nedum in theologia scholastica, verum etiam in sacris Conciliis plurimum se versatum ostendit. (Analecta Aug., Vol. XI, p. 373). Item accidit in comitiis gen. an. 1685, quibus Fr. Bacc. Bernardinus Dom. Grugnetti de Gravellona in Collegio Neap. Lect. Logicae, theologicas theses defendit sub praesidio eiusdem Gavardi, praefati Collegii moderatoris, qui in tuendo potissime contra recentiores exantiquatam D. Protoparenti doctrinam tanti Patris verum se praebuit non minus filium quam imitatorem, omniumque ora in sui laudem convertit. (Idem, Vol. XII, p. 10). Iamdudum Neapolim incoluerat, et capitulo gen. Romano an. 1693 Terrae Laboris Provinciam ut discretus repraesentaverat. Inde vero Romam accersitus, non tantum Cardinalis Mariscotti theologus extitit, verum etiam a Summo Pontifice designatus fuit ut sacram Scripturam publice interpretaretur, quam cathedram ad 25 annos moderatus fuit. Laudatur a Philippo Argelati in biblioth. Script. Mediolanensium, a nostratibus Ossinger, p, 387 et Antonio Dom. Gandolfo, in suis Fiori Poetici, p. 111 propter Poesis peritiam et insignis oratoris nomen. Conciones habuit Veronae, Utini, Florentiae, Senis, Anconae, Neapoli, Viterbii et alibi. Acceptissimus fuit Cardinalibus Io. Nicolao Conti et praefato Henrico Noris, nec non eruditissimo Antonio Magliabechio, quamplurimisque sui aevi doctissimis viris. Tandem eximius vir, atque in omni fere scientiarum genere versatus, decubuit Romae, labore magis, quam aegritudine consumptus an. 1715, die 12 iunii, aetatis suae 76. Opera eius sunt:

1. Theologia exantiquata iuxta orthodoxam B. Ecclesiae Magistri Augustini doctrinam a Doctore fundatiss. B. Aegidio Columna Ord. Erem. S. Aug. expositam. Neapoli, Typ. Ant. Gramignani et Cam. Cavalli et Romae, ann. 1683-1696, Vol. 6 in fol., quae in XX tractatus compendiata a P. M. Benigno Sichrowsky eiusdem nostri Ord. Bohemiae Provinciali, edita fuit, Norimbergae 1720, Tomis 3 in 4°.

2. Quaestio IV de Hierarchia Ecclesiae militantis excerpta ex T. II, libri II Sententiarum Theologiae exantiquatae. Neapoli, 1690, in 4°. Typis Camilli Cavalli.

3. Philosophia vindicata ab erroribus philosophorum iuxta doctrinam B. P. Augustini Eccl. Doct. et B. Aegidii Columnae eiusd. Ordinis. Romae, ex typ. Buagni, 1701, in fol.

4. Index controversiarum B. Aegidii Columnae... super primum librum Sententiarum ad novam methodum reductum... ac E.mo et R.mo Principi D. Palutio de Alteriis... Disputabuntur publice in D. Augustini de Urbe... an. 1679, mense maii... Romae, typis Varesii impressum, ff. 23-34. Est in cod. 897 (R. 3, 8) Bibl. Angelicae de Urbe.

5. Carmina quaedam edita e nostrate Gandolfo in Fiori Poetici, pp. 112-117.

6. Votum insigne adversus opus Petri de Marca de Concordia Sacerdotii et Imperii. Ms. et alia.

 

 

 

Referenze:

Lanteri, Postr. Saec. Sex R. A., T. III, p. 96; Hurter, Nomencl. Lit., T. IV, col. 680, et Lopez, in Addit. ad Crusenii Monasticon, T. III, p. 452