GENESTANO HIERONYMUS

 

 

 

de Genestano Fr. Hieronymus, nostratum percelebris Mariani nepos et Pauli germanus frater, fuit et ipse honestate morum ac scientia clarus. In conventu Neapolitano illum sua studia magna cum laude peregisse videtur, atque inibi Lectorem et Baccalaureum renuntiatum fuisse. Tamquam Discretus Apuleae Provinciae an. 1505 interfuit Capitulo Generali Perusiae celebrato, ac Sacrae Theologiae Doctor inde proclamatus; et an. 1508 in Neapolitano nostro Studio fit Magister Regens. Per plures annos postea illius conventus habenas tenuit, et an. 1516 mittitur Perusiam Regens. Sacram interim quadragesimam, anno scilicet 1517, Capuae praedicavit, et anno postero, cum esset suae Romanae Provinciae praefectus, adfuit Generali Capitulo, Venetiis habito. Ad erudiendam Augustinianam pubem subinde Perusiam revertitur, iterumque, anno nempe 1522, fit sua Provinciae Praeses. Artissimo necessitudinis vinculo Gabrieli Veneto Priori Generali coniunctus, ab eo suus Commissarius ac iudex in diversis fratrum causis fuit constitutus, cuiusque decreto, mense aprilis anno 1525 dato, a Civitate Anagnina debitam sibi mercedem exigere valuit, eo quia in ea grammaticae facultatem edocuerat, publico stipendio conductus. An. 1526 adhuc inter vivos agebat, atque ab eo extat: Quaestio: an detur suppositio materialis in mente, edita una cum Mag. Augustini de Montefalcone expositione super libris priorum fundamentarii doctoriis Aegidii Romani Columnae. Venetiis, mandato et expensis Luceantonii de Giunta Florentini, anno 1522, in fol. 

 

 

 

Referenze:

Torelli, Secoli Agostiniani, T. VII, pagina 619, qui inter celebriores oratores illius aevi illum adnumerat; Perini, Un Emulo di Fr. Gir. Savonarola, Fr. Mariano da Genazzano, Roma, 1917, p. 9, in nota et Ordinis Regesta