GROPPANTES PHILIPPUS

 

 

 

Groppantes Fr. Philippus, Florentinus, theologus ac concionator egregius, ut posteris sua etiam eruditione proficeret, concionum suarum amplum volumen reliquit, quod hodie (nempe an. 1581) servatur Pisis in monasterio Ordinis. Ita Pamphilus, p. 94. In Generalium Epistolarum Registris, die 6 iulii an. 1456 electus Scarperiae in Provincialem provinciae Pisanae a Priore Generali confirmatur; die 8 aprilis an. 1458 Regens instituitur coenobii Florentini; die 3 martii anno 1460 Capitulo celebrando Praeses tertio loco deputatur; die 9 octobris 1473, scribit Generalis Iacobus de Aquila: "fecimus magistrum Regentem in conventu et studio nostro Florentino Ven. Magistrum Philippum de Florentia pro quinto anno generalatus nostri, scilicet an. 1474, cum omnibus gratiis et emolumentis consuetis". Die 29 iunii 1479 ad benepiacitum P. Generalis confìrmatur in Priorem conventus S. Spiritus Florentiae. Idem evasit in Capitulo generali Perusino an. 1482 usque ad festum Sanctae Pentecostes an. 1484; et nihil aliud, scribit Herrera, T. II, p. 283, de Philippo Groppantes, aut alio Philippo Florentino in Registris habetur. Mirum sane est usque ad annum 1495 supervixisse, et ab an. 1484 tam illustris viri per tot annos nullam fieri mentionem, praesertim ab an. 1460 ad annum 1470 cum M. Guillelmus Becchius Florentinus Ordinem gubernaverit. Sepultus iacet in Capitulo coenobii Florentini inter alios viros illustres, marmoreo tumulo decoratus, cui insculpta verba Philippum fuisse theologum et concionatorem insignem, dieque 20 novembris (ut relatio ad nostratem Herrera ex eo coenobio missa tradebat), anno 1495 debitum naturae persolvisse. Ex quodam ms. in quondam nostra Bibliotheca Cortonensi a nostro Gandolpho (cfr. eius Dissertationem Hist. de 200 celeberr. Aug. Script., p. 303-5) inibi observato, cui titulus: Thomae de Argentina super quatuor sententiarum opus scriptum per Magistrum Philippum Groppantes de Florentia Neapoli in conventu S. Ioannis de Carboneto 1467, 11 iunii, videtur Philippum nostrum ab an. 1460 ad an. 1470 Neapoli vitam duxisse ac in conventu S. Ioannis Sententiarum libros explicasse. Praeter Concionum suarum amplum volumem ms. Pisis in monasterio Ordinis olim asservatum, ut testatus est Pamphilus, aliud volumen, forsan eorumdem sermonum, vidit Gandolphus (Cfr. l. c.) in olim "nostra Bibliotheca Monasterii S. Olivae de Cora in Latio, Ordinis nostri, ms. membr. fol. cuius titulus: Incipiunt Sermones praedicabiles ex Flosculis diversorum Doctorum ordinati per Magistrum Philippum Groppantes de Florentia Ord. Fratrum Erem. S. Augustini, dicato "Spectabili ac ingenioso viro Ioanni Brunecto Brunecti filio ex nobili Florentinorum progenie". 

 

 

 

Referenze:

Torelli, Vol. VII, p. 446; Negri, p. 172 et Ossinger, p. 417