LANFRANCONI PETRUS

 

 

 

Lanfranconi Fr. Petrus ex patre Nicolao Franconi de Mondello Mediolanensi et matre Diana Masseri Anconitana in hac civitate die 22 ianuarii 1596 ortum habuit, et cum 13 esset annorum Augustinianum habitum induit ac exinde, patre consentiente, maluit cognominari Lanfranconi. Post expletum studiorum curriculum Regentis munus adeptus, Augustinianos alumnos docuit Recineti, Neapoli et Romae, atque post magistralem lauream obtentam, alios docere prosequutus fuit Eugubii, Anconae, Arimini, et Mediolani; ac deinde Bononiensis, et postea Anconitani coenobii prioratum gessit.

An. 1655 eligitur totius Ordinis Procurator Generalis, et an. 1661 in comitiis generalibus Romae habitis universi Ordinis habenas accepit. Sui Generalatus tempore, anno scilicet 1666, ab Alexandro VII canonizationem S. Thomae a Villanova impetravit. Demum an. 1667, die 3 augusti Interamnensi in Umbria Episcopatui praepositus fuit. Rexit Ecclesiam sibi commissam cum optimi pastoris laude usque ad annum 1674, quo ad regionem immortalitatis iturus illi valedixit die 6 martii. Ita Lanteri, Eremi Sacrae, Part. I, p. 96. Illius extant:

1. Decreta universalia Capituli Generalis Ordinis FF. Erem. S. P. Augustini Romae celebrati (d. 22 iul.) anno Domini 1661, pro eiusdem bono regimine, ac regulari observantia, publicata a R.mo P. Petro Lanfranconio, generali electo. Impressa et extant in cod. 230 Bibl. Angelicae, f. 92. Quae edita etiam fuere una cum actis eiusdem capituli in Analectis August. Vol. X, pp. 41-64.

2. Eiusdem Litterarum Regesta asservata in Archivo Ordinis D. d. 97-103. Celebrantur Lanfranconius noster etiam ab Ughell., T I col. 765 in addit.; a Iuliano Saracini in Notitiis hist. Anconae, Part. III, p. 522 et a Golucci T. 27, p. 72.