de LAVELLO ROGERIUS

 

 

 

de Lavello Fr. Rogerius, S. Theol. Magister, die 6 maii an. 1302 erat Neapoli de familia constitutus. Id eruitur ex quodam instrumento hoc anno in loco Fratrum heremitarum Ordinis beati Augustini de Neapoli praesentibus "religiosis viris fratre Rogerio de Lavello, sacre pagine in Theologia Magistro, Fr. Angelo de Sancta Gilia..." rogato, quo Iacoba de Cresciencio, domini Sergii de Neapoli vidua relicta, donat conventui S. Augustini de Neapoli 12 uncias auri ex 24 quibus ei et eius viro conventus erat obligatus (cfr. Analecta Aug., Vol. XII, p. 138. Anno 1326 erat Prior conventus Parisiensis: die 17 iunii 1329, ut Definitor, interfuit capitulo generali Parisii celebrato; itemque capitulo gen. Venetiis die 12 Iunui an. 1332 habito et capitulo gen. Grassae an. 1335. Rev.mus P. Eustasius Esteban, Analecta cit. Vol. V, p. 207, ignorans documentum Neapolitanum cit. arbitratus est nostrum Rogerium ad magisterium promotum fuisse an. 1328 exeunte, cum iam ab an. 1302, ut vidimus, in sacra theol. esset magister.

Ideo corrigendus. Item suspicatus est illum inter theologos extitisse, qui cum aliis quatuor Augustiniensibus an. 1335 de quaestione super visione beatifica disputarunt, quamvis Denifle et Chatelain in eorum Chartulario Parisiensi de Rogerio Glacton, anglo, ex nostro Ordine ibi agi suspicentur. Illius etiam meminit Aloysius Torelli, Secoli Agost., Vol. VI, p. 778 sub an. 1448, deceptus ab Herrera. Eius extat: Postilla super librum Sapientiae in cod. 381 Bibl. Angelicae Urbis, saec. XV, ff. 72, binis coll. in principio mutilo Expl.: "explicit postilla super librum sapient. edita a fratre Rogerio de Lavello sacre pagine professore fratrum herem. sancti Augustini"; prosequitur rerum tabula alphabetica. 

 

 

 

Referenze:

Thom. Herrera, T. II, p. 349, qui decipitur circa tempus in quo floruit; Ossinger, p. 499 et Narducci, Catal. cit. p. 185