LIBERTA' IOANNES FRANCISCUS

 

 

 

Libertà Fr. Ioannes Franciscus, Tarvisinus, cuius sub an. 1560 meminit Pamphilus, egregius divini verbi praeco fuit, et Marchiae Tarvisinae Provincialis et Vicarius Generalis. Eum Gabriel Venetus Ordinis supremus moderator sub die 2 iunii 1523 cursorem destinavit in gymnasio Patavino cum solitis honoribus et oneribus. Nominatus inde Lector in capitulo generali Tarvisino an. 1526 item Paduae S. Theol. Baccalaureus promotus evasit, et duobus post annis mense iulii S. Theol. Magister una cum Christophoro Patavino, Adeodato Appulo et Ambrosio Mediolanensi, cum mense maio jam constitutus fuisset Tarvisini conventus Prior. Mense maii 1539 uti Definitor Provinciae Coloniae interfuit Capitulo Generali Neapoli celebrato. Magno animarum fructu frequentissime in principalioribus Italiae Urbibus verbum Dei praedicavit.

Deum primum timens, in rebus omnibus prudens et in pauperes et indigentes misericors, cum Romae an. 1551 ad S. Laurentium in Damaso sacram quadragesimam praedicasset montem pietatis, ubi sine foenore mutua datur pecunia, cum antea, apud Iudeos ad numum vigesimum pauperes gravarentur, mutui usura gravissima et intollerabili, institui curavit. Eum Alexius Stradella Ordinis Procurator et Vicarius Generalis, an. 1572 patribus Patavinis Visitatorem dedit his verbis: "M. Ioannem Franciscum Tarvisinum, nostri amantissimum, Ordinis zelatorem quam maximum, Deique plurimum, ut omnes nosse potestis, timentem, atque in rebus omnibus prudentem et expertissimum, cuius prudentiam, integritatemque maiores nostri saepe sunt experti, ad vos Visitatorem, commissariumque nostrum mittimus". Non constat quando ex hac vita migravit. Extant ab eo:

1. Duo epistolae, una ad Card. Petrum Pacheco, d. Tarvisii 22 iulii 1555 et altera ad Philippum Avogarum, d. 22 angusti 1569.

2. Oratio de Antiquitate et laudibus Tarvisii habita in Ecclesia Cathedrali anno 1520, et reperiuntur Romae in Bibl. Angelica, cod. 762 (Q. 5. 39) una cum epistolis Aegidii Viterbiensis, Hieronymi Seripandi, Gabrielis Della Volta, Christophori Patavini et aliorum ad eudem P. Libertà datis. 

 

 

 

Referenze:

Pamphilum, in Chronica Ordnis, Romae 1581, f. 121