de LUCA GREGORIUS

 

 

 

de Luca Fr. Gregorius, male ab Herrera, T. I, p. 308, Gabriel dictus, an. 1295, iam lector, interfuit Capitulo Generali Senensi, hoc anno celebrato, ubi generales disputationes habuit. An. 1318 in Capitulo generali Ariminensi examinator constituitur studentium promovendorum ad officium lectoriae in aliquo studio de lingua occitana, ad quam, forsan, pertinebant, provincia Provinciae et provincia Tolosana. Ni fallimur, hic Gregorius, qui et Gregorinus vocabatur, an. 1322 creatus fuit a Ioanne XII die 7 iunui Episcopus Sorrensis et an. 1323 die 6 iunii, translatus ad ecclesiam Feltrensem. An. 1324 die 7 iulii ei commendatur administratio ecclesiae Tergestinae. Eubel, qui, dum de eius electione ad Episc. Sorrensem agit, eum asserit O. Erem. S. August. (Hierarchia, T. I, p. 458), in translatione ad ecclesiam Feltren.. et Bellunen. (ibid. p. 132) errore manifesto, ipsum dicit Ordinis Praedicatorum; nec errorem corrigit cum agit de ecclesia Tergestina (ibid., p. 477). Demum a Summo Pontifice facultatem obtinuit disponendi de nonnullis bonis, non obstante professione religiosa; post paucos vero dies mortuus est; nam die 20 februarii eiusdem anni, ob mortem nominatus fuit Episcopus Feltrensis Gorzias, archidiaconus ipsius ecclesiae, qui ei antea Episcopatum contenderat. Eius executor testamentarius fuit Mag. Fr. Ioannes Pagnotta, nostri eiusdem Ordinis, qui ei a confessionibus erat. De eius episcopatu nihil reperitur apud Ordinis nostri scriptores. Anno 1321 cum esset Sacrae Theologiae Magister et Avenione moraretur, iussu Summi Pontificis opus composuit super Moralium Iob (Liber Moralium S. Gregorii), pro quo, diversis temporibus, LXX florenos aureos recepit.

 

 

 

Referenze:

Saturn. Lopez, Notitiae ad Ord. FF. EE. S. Aug. spectantes ex libris intr. et exit. Camerae Apost. in Anal. August., Vol. IX, pp. 82-83, 96, ex quo haec fere ad litteram aussimus