de MARLIANO IOANNES

 

 

 

de Marliano Fr. Ioannes, Mediolanensis, S. T. M., in antiquis membranulis vetusti codicis coenobii Mediolanensis, doctor eximius et in omnibus artibus eruditissimus nuncupatur. Florebat tunc Mediolanensis domus viris illustribus nobilitate generis, litterarum cognitione et Religionis observantia, et inter eos Ioannes non parum eminebat. Ioannes simul cum Paulo de Pisis ab insigni Paulo Veneto de facultate D. Petri Marcelli Episcopi Patavini et Paduanae Universitatis cancellarii donatus ést laurea magistrali. Ita legi in codice antiquo ms. Bibliothecae Angelicae, oratione 43, quae est ipsius Pauli Veneti, Paulo et Ioanni gradum doctoratus donantis.

Eum, orto schismate in Synodo Provinciae Anglicanae, quae eo saeculo viginti sex, non magistrorum larvas et inania nomina, precibus, an pretio dixerim et importunitate Principum mendicata et extorta, sed magistros litteris et doctrina praestantes alebat, B. Augustinus Romanus Generalis in capitulo generali Astensi am 1419 illuc mittendum decrevit. Sed re maturius considerata, satius Augustino visum est Anglico morbo medicos Anglicos, Henricum Colchester, et Ioannem Bricherford, in sacra Theologia magistros et eiusdem Capituli Diffinitores, destinare. At Ioannes inter suos manens die 19 aprilis an. 1423 erat socius Prioris Generalis et die 16 martii an. 1424, post M. Nicolaum de Cremona studii Paduani Regens instituitur; et die 3 februarii an. 1425, post M. Paulum de Cambiago Mediolanensem, Provincialis Lombardiae erat; et die 26 octobris an. 1426 pro Capitulo Cremonae celebrando an. 1428 primo loco praeses praescribitur. Die 9 septembris an. 1427 simul cum M. Francisco de Florentia Generalis socio, omnium ultramontanarum provinciarum Visitator Generalis designatur.

Anno 1433 die 29 iulii Gerardus de Arimino Generalis eum dilectum socium suum vocat et Generalem suum Vicarium constituit in Concilio Basiliensi; et die 26 iulii 1434 affirmat se illum in tota Italia vicarium Generalem reliquisse dum iret ad Concilium Basiliense; et die 19 martii 1436 Regentem Papiensiem assignat pro anno tertio a capitulo Mantuano. Tandem variis perfunctus muneribus an. 1451 die 13 decembris Mediolani rebus humanis exemptus est. In Bibliotheca Mediolanensi asservatur codex ingens ms. cujus titulus est: Abbreviationes in Primum Michaelis de Massa et in fine ipse restatum reliquit: Quas inchoaveram an. 1410 abbreviationes in Primum Sententiarum Doctoris insignis M. Michaelis de Massa Ordinis Eremitarum S. Augustini, Ego Fr. Ioannes Mediolanensis de Marliano Conventus Lector, tandem consummavi an. 1430 die 12 Octobris, dum Padua essem Magister Regens. Haec ad verbum ex Herrera, T. I, p. 470; ast ingens hic codex olim in nostra S. Marci asservatus, nunc ubi reperitur? Illius meminit etiam Ossinger, Bibl. Aug., p. 554.