MARRA DONATUS

 

 

 

Marra Fr. Donatus, Beneventanus, S. Theol. Mag., an. 1543 erat studens in gymnasio Romano; an. 1547 promotus fuit ad gradum Lectoris et locatus Venetiis ubi an. 1551 fit Baccal. et licentiatur ad suscipienda, post annum, insigna magistralia. An. 1555 erat Mag. Regens conventus Neapolitani, et an. 1557 electus fuit in Provincialem Provinciae Terrae Laboris, quo munere interfuit cap. generali Venetiis an. 1559 celebrato. Ivit illuc, quo priores abierunt, an, 1580. "Fuit theologus insignis, ait Pamphilus in Ordinis Chronica, f. 131, et in componendis monasteriis industrius, qui confectionis magnificae et nobilis fabricae monasterii S. Augustini civitatis Neapolitanae fuit hortator et auctor, multamque diligentiam adhibuit ut construeretur et prosequeretur: monasterium quoque Beneventanum non solum convenientibus aedificiis exornavit et poene ex integro restauravit, sed fundis redditibusque auxit et ampliavit".

Extant ab eo, praeter alia, typis datae: Enarrationes in hymnos omnes qui cantantur in Ecclesia secundum ordinem Breviarii nuper editi et secundum morem Religiosorum Ordinum S. P. Aug. Bened. Domin. Francisc. et Carmelitarum. Neapoli apud Horatium Salvianum, 1578, in fol. et iterum Ferrariae 1760, in 4°. Exornant has editiones nonnulla egregia poemata RR. Melidoni Corani et Antonii Siculi eiusdem Ordinis nostri fratrum. 

 

 

 

Referenze:

Gratianus, p. 66; Herrera, T. I, p. 201; Marracci, Bibl. Marian. Vol. I, p. 353; Toppi, Bibl. Neapol., p. 74; De Nicastro, Pinacotheca Benevent., p. 176; Ossinger, p. 557 et Ordinis Regesta