MARTINELLI SEBASTIANUS

 

 

 

Martinelli Fr. Sebastianus, S. R. Eccl. Cardinalis, e Cosma et Magdalena Pardini die 20 augusti 1848. Lucae in paroecia S. Annae extra moenia ortus, germanus fuit, natu minor, Thomae Martinelli, qui et ipse sacra purpura fulsit, ac P. Aurelii S. Theol. Magistri, utriusque Ordinis nostri decoris, nam si Fr. Thomas sapientia, amplissimis dignitatibus et sanctitate maxime enituerit, Fr. Aurelius, maximis curis et laboribus nostrum Genestanense B. M. V. de Bono Consilio ad splendorem usque restauravit. Horum exemplum secuutus, 15 aetatis anno vix expleto, Ordini nostro dedit nomen. In Genestanensi coenobio tyrocinio peracto, ac inibi professione emissa, Romam ad S. Augustini collegium vocatur, ubi philosophiae ac teologiae studio quammaxime incubuit, sacerdotio die 4 martii 1871 initiatus atque post annum Lectore. Docuit deinde, pro-Regentis nomine, nostros religiosos Hibernos philosophiam et theologiam in conventu S. Mariae in Pusterula, dieque 31 ian. 1877 Studiorum Regens, in universa theologia periculo summa cum laude peracto, declaratur. Laurea doctorali insignitus mense septembri an. 1881, et paulo post Postulator Causarum Beatificationis et Canoniziationis Servorum Dei Ordinis nostri apud Sacram Ritum Congregationem nominatus, neminem latet qua solertia hac in re se gesserit. Convocatis interim in S. Monicae Collegio comitiis gen., quamvis reluctans, supremus Ordinis moderator est renuntiatus, ac post sexennium in eodem munere est confirmatus.

At decem mensibus nondum expletis a Leone Pp. XIII, qui illum iam a mense decembri 1892 in consultorem S. et U. Inquisitionis adsciverat, ac eius egregias dotes perspexerat, die 7 augusti 1896 infula archiepiscopali auctus, in status Foederatus Americae Septentrionalis ut Apostolicae Sedis Delegatus mittitur. Ibi vero eo magis emicuit eius prudentia ac dexteritas, quo graviores erant res peragendae. In omnibus ea suavitate atque humanitate usus est, ut omnium animos sibi conciliaverit, ac tandem a Summo Pontifice die 15 aprilis 1901 sacra purpura muneratus fuit, susceprurus insequenti anno, die 9 iunii, galerum et titulum praesbyterialem S. Augustini, cuius templum amplissimo organo ditavit. Omni ope exinde enisus est, ut Congregationibus Romanae Curiae suam praestaret operam, scilicet: Consistoriali, de Sacramentis, de Religiosis, de Propaganda Fide, Indicis, de Negotiis Ecclesiasticis extraordinariis, de Seminariis et Studiorum Universitatibus, et ab ore E.mi Cardinalis Seraphini Vannutelli ego ipse audivi quod cum in negotiis vel causis istarum Congregationum Cardinalis Martinelli relatorem ageret, vel sententiam diceret, tum ipse Vannutelli tum alii, tute ac confidenter eorum assensum Martinellianae sententiae praestabant. Nullis parcens laboribus atque vigiliis, magna cum sedulitate SS. Rituum Congregationi praefuit; nec silentio praeferendum supremis Apostolicae Signaturae iudicibus fuisse quoque adscriptum nec non et Cardinalium Commissioni, quae modernum Iuris Canonici codicem redigendi mandatum habuit. Longo et insanabili morbo oppressus, e vita excessit die 4 iunii 1918. Eius iussu extant in lucem editae:

1. Constitutiones Ordinis Erem. S. Augustini... in aptiorem formam redactae. Romae, ex Typ. Pacis, Philippi Cuggiani, 1895, in 16°.

2. Eius Regesta litterarum, quae sunt in Archivo Ordinis, tribus vol. in fol. 

 

 

 

Referenze:

Perini, Stud. Bio-Bibliogr. sul Card. Ciasca, Appendice I, p. 105; Rodriguez, Litterae Circulares Universo Ordini datae sub die 15 aprilis 1901 et die 7 iulii 1918, in Analectis August., Vol. VIII, p. 337