MELORI HIERONYMUS

 

 

 

Melori Fr. Hieronymus, Fulginas, Sacrae Theol. Magister, dicitur ab Herrera, T. I, p. 355 ex Phamphilo, spectata integritate omnibus charus, litterarum divinarum scientia ac morum maiestate et comitate admirabilis, qui Religionem mirabilius, magnificentiusque quam alius aliquis auxit et honestavit. An. 1519 in capitulo generali Venetiis celebrato die 11 iunii "Magr. Hieronymus Fulginus, uti habetur in Actis, habuit orationem et ornatissimam et certe eruditissimam" eodemque die a Patribus vocalibus omnibus viva voce electus fuit in Procuratorem Ordinis. Insuper in Capitulo Generali Tarvisino an. 1526, etiam in eo assurgens, et suggestum scandens "orationem habuit, ut in Actis, pulcherrimam de religione conservanda et propaganda, summis laudibus celebratos plerosque enumerans, qui eam recte gubernaverint, auxerint, excoluerint. Qua quidem oratione, ut multa ad rem luculenter satis et eleganter, ita ad excitandos omnium animos vere atque utiliter commemorata sunt naufragia, quibus Eremitana Religio nostra hac tempestate eo usque iactata est, ut nullum suo moderatori reliquerit, non modo ociandi, sed ne respirandi quidem spatium, curamque eidem attulerit perpetuae sollicitudinis ac molestiae plenam, ac nisi eius industria, solertia et apud christianos principes gratia accessisset, mox certe undis dedisset latus". Post quam orationem Hieronymus fuit in suo Procuratoris Generalis munere confirmatus, in eo manens usque ad diem 7 maii 1534 quo piissime obiit, Religioni per sexdecim annos serviens "summa cum diligentia, modestia ac fide" ut de eo scripsit Gabriel Venetus in suis Registris sub die 12 maii 1534.

 

 

 

Referenze:

Reliquit iuxta Torelli, T. VIII, p. 190, Ossinger, p. 578 et Iacobilli, Catal. Script. Prov. Umbriae, p. 136: multas orationes, poemata nonnulla et Epistolas.