MONTI GABRIEL

 

 

 

Monti Fr. Gabriel, S. Theol. Mag., actualis Ordinis secretarius, vir acri ingenio, sana doctrina, morum probitate, bona indole, eximia in agendis dexteritate praeditus, Potentiae Picenae die 15 octobris an. 1878 ortus, die vero 13 octobris 1893 Ordinem ingressus, ac die 28 Oct. an. insequentis professus, post studia laudabiliter peracta, die 25 iul. 1901 Presbyter effectus est. Renuntiatus Lector post annum continuo docere coepit philosophiam, theologiam ac ius canonicum, in quo specialiter se dicavit. Habet igitur confectum Iuris Canonici Cursum sed ineditum et alia tum theologica tum philosophica ac oratoria, nam est etiam ornatus orator. Interim omnia illi fausta ominamur.