NALDINI PAULUS

 

 

 

Naldini Fr. Paulus, nobilis Patavinus, in patrio coenobio Eremitarum Ordinem amplexatus, diversis in conventibus studiorum curricula explevit. An. 1667, cum esset Placentiae Bacc. Studiorum Regens, Romam accersitur ut capitulo gen. adesset, et in eo die 24 maii egregiam de S. Thoma Villanovano concionem declamavit. Anno insequenti erat Papiae Regens, et iterum Romam accersitus, sui periculo in universam theologiam laudabiliter peracto, die 5 maii magistrali laurea fuit decoratus. An. 1670 Mediolani Regens fuit constitutus, et in cap. gen. romano an. 1673 perelegantem orationem de electione in eo habuit, cum tum Regens esset Bononiae.

In capitulo gen. vero an. 1679 Italiae Assistens fuit electus. Anno 1686 (scribit Lanteri in Eremi Sacrae Aug., Parte I, p. 98) die 11 martii ab Innocentio XI Iustinopolitano Episcopatu dignatus fuit, et die 25 eiusdem mensis et anni Romae in Ecclesia S. Augustini episcopalem inaugurationem accepit ad E.mo Cardinali Alexandro Crescentio, cui adfuerat noster Iosephus Eusani Ep. Porphiriensis, et Petrus Antonius Capobianco Episc. Lecadoniensis. Die autem 9 iunii solemnem ingressum fecit in suam civitatem episcopalem, in qua collegium clericorum Illiricorum non multo post instituit. An. 1690 habuit Synodum dioecesanam, quam etiam typis evulgavit, et in aedibus episcopalibus antecessorum suorum seriem figuris et inscriptionibus delineari iussit. Ex hac vita migravit mense iulio 1713. Scripsit atque edidit sequentia, quorum tituli:

1. Lectulus Salomonis, quem sexaginta fortes ambiunt; hoc est, Sacra Magni P. Augustini Theologia a sexaginta Eremitici sui Ordinis scriptoribus scolastice deducta ... Romae typ. Iac. Ant. de Lazaris Varesii, 1679. In Bibl. Angelica Cod. 897.

2. Synodus Iustinopolitana. Venetiis, 1690.

3. Corografia ecclesiastica, ossia descrizione della nostra diocesi di Giustinopoli. Venezia, 1700.

 

 

 

Referenze:

Ughelli, Italia Sacra a Coleto aucta, T. V, col. 394, et Moroni, Dizionario, Vol. 80, p. 267-269