Percorso : HOME > Monachesimo agostiniano > Storia dell'ordine > Storiografi OSA > Crusenio > Monasticon

Nicola Crusenio: Monasticon

Agostino e i suoi monaci dal manoscritto ms. II di Firenze che contiene una versione della Città di Dio in lingua italiana. Datato 1433, al foglio 315 è firmato da A. di Lorenzo

Agostino e i suoi frati

disegno a colori dal ms. II di Firenze che contiene

una versione della Città di Dio in lingua italiana.

Datato 1433, al foglio 315 è firmato da A. di Lorenzo

 

 

CAPUT. IX

De P. Augustino Novello, VII Generali

 

 

 

 

Comitiis habitis Mediolani ac Simone Priore Generali se magistratu abdicante, eligitur P. Augustinus Novellus S. D. N. Poenitentiarius, qui utriusque Juris ac Theologiae Doctor, quondam Manfredi Regis Siciliae fuerat Cancellarius. De quo praeclara scribunt Auctores Ordinis, et nos tetigimus miraculosum illius accessum ad Ordinem supra, in Clemente Auximano.

Absens is erat, cum huic muneri destinaretur, nuntiumque sibi, ut rebatur, infelicissimum, dure excipiens, aliquandiu restitit; donec Patrum precibus victus, morem Spiritui sancto gerere volens, consensit in electionem. Manum itaque operi apponens, statim relicta aula, ubi Pontifici erat a secretis Confessionibus, uti verus Pastor ad Monasterii sui greges accessit; cunctos verbo et exemplo praecedens, a Bonifacio Ordinis exemptionem impetrat omnimodam a quacumque Dioecesani jurisdictione, nec Religiosis tantum, sed omnibus una cum Religiosis commorantibus, prout eadem expressius in Bulla Bonifacii VIII, Laterani data XII Kal. Febr. continetur. Sufficiebatur tunc in locum P. Augustini Novelli, tum apud Poenitentiariae, tum apud Sacrarii Pontificii sedem, Venerabilis P. Jacobus Camertinus, qui pro Ordine jam dudum Curiae procuratorem egerat, manente hoc officio ex hoc tempore usque ad haec nostra semper Ordini S. Augustini haereditario jure, ac Sedis Apostolicae beneficio.

Visitavit Augustinus Italiae universae Monasteria, Ordinique praefuit, cum multa charitate, humilitate, et justitiae zelo; humilis in exhortando, severus in corripiendo, omnibus benignus, licet sibi austerus. Festinavit autem sarcinam regiminis deponere et ad solitudinem redire; duobus etenim annis in regimine peractis, Capitulum Generale Neapolim indixit; eoque congregato, resignationem officii agressus, nullis precibus adduci potuit, ut ulterius Ordinis curam gereret, quamvis ad quartum diem instanter hoc omnes peterent, etiam adhibita intercessione Caroli Regis Neapolitani, quem uti deprecatorem omnes Patres Augustino submiserant.