XLIX

MONASTERIA MONIALIUM AUGUSTINENSIUM AB AN. 1400 AD 1450

 

 

 

 

Monasterium Mantellatarum tit. Sanctae Monicae Alexandriae in Pedemontio erigitur circa an. 1433.

Monasterium Ariminense tit. S. Augustini fundatur circa an. 1400 a nostrate B. Michaelina de Arimino; postea tamen ad Ordinem Canonissarum Regularium trarisivit.

Monasterium Bononiense tit. S. Ursulinae jam extabat an. 1432. Situm erat in suburbio S. Vitalis.

Monasterium Burdigalense (di Bordò) tit. S. Monicae memoratur ad an. 1436.

Monasterium Cassiae tit. S. Mariae Magdalenae in Umbria fundatur ante an. 1407. Est adhuc Ordini subjectum, et vocatur titulo B. Ritae, quae illud Augustinensium virginum asylum per totum Orbem terrarum celeberrimum reddidit.

Monasterium Civitatis Castelli in Umbria jam incolebant Mantellatae Augustinianae anno 1432.

Monasterium Civitatis Ducalis in Aprutio tit. S. Luciae extabat an. 1421.

Monasterium de Cysmulin in dioecesi Midensi in Hibernia nominatur ad an. 1409.

Monasterium Eugubii in Umbria tit. Luciae extabat an. 1437.

Monasterium Ferrariae tit. S. P. Augustini extruitur ab Alisa Joannis del Gallo civis Ferrariensis filio, quae cum tredecim aliis virginibus Eremitanum S. P. Augustini Ordinem amplexa est an. 1429. Subditae fuerunt illae Moniales jurisdictioni Episcoporum Ferrariensium usque ad an. 1524, quo ab Augustinensibus Congregationis Lombardiae regi coeperunt. Iterum tamen Episcopis illud monasterium subjectum fuit an. 1590.

Monasterium Florentiae tit. S. Monicae piis Christifidelium largitionibus extruitur circa an. 1450. In illud post viri obitum se recepit D. Camilla de Medicis Martellia, Cosmi Medicei Magni Hetruriae ducis uxor, mansitque usque ad an. 1591, quo vitam cum morte commutavit.

Monasterium de Grave in dioecesi Dublinensi in Hibernia extabat an. 1412.

Monasterium Bredae tit Montis Pacis erigitur a D. Maria Joanna uxore Joannis de Nassau, filii Engelberti, et Joannae Polanae dominae Bredae, et Laeccae, prope urbem Bredam in Belgio circa an. 1450, ejusque prima Priorissa fuit Odilia praefatae fundatricis filia. Hoc monasterium an. 1610 opera Episcopi Antuerpiensis translatum fuit Liram.

Monasterium Mediolani tit. S. Augustini de Vedano extabat ante an. 1440. Verum eodem anno cum aliquot ejusdem monasterii moniales vellent ad S. Clarae Ordinem transire, jussu Nicolai V ad dissidium eliminandum media monasterii pars Clarissis tradita fuit, et altera media pars cum integra ecclesia monialibus illis, quae in regula sua priori S. Augustini erant remansurae relicta.

Monasterium Patavii tit. de Bethleem erectum fuit an. 1441 a Pallante Strozzi Florentino in hospitali nuncupato coecorum de Bethleem quod Patavina civitas donarat B. Michaelinae Papiensi, quae Arimini fuerat quasi generalis gubernatrix totius Ordinis Monialium Observantiae S. Augustini, quae Patavium vocata fuerat ut Benedictinas S. Matthiae ad meliorem frugem reduceret. His ergo reformatis in novam domum ex Eugenii IV concessione, die 22 Decemb. 1441 nostra Michaelina e monasterio Arimenensi adduxit Sorores Augustinenses, Franciscam Fanensem, Onophriam Foroliviensem, Agatham de Castellione, Simonam de S. Laurentio de Caesenatico, et Birgittam Ariminensem.

Monasterium Romae Augustinensium Mantellatarum fundatur a D. Margarita Thomai, nostratis Ven. Bartholomaei Thomai germana sorore, ante annum 1431.

Monasterium sive reclusorium sororum de obedientia Ordinis S. Augustini Romae in regione Campi Martii, in Monte Acceptoro, fundatur an. 1439 a nobili femina D. Maria de Curtiis, vidua D. Poncelli de Ursinis, quae Eremitani S. Augustini Ordinis habitum induerat.

Monasterium Valentiae in Hispania tit. S. Juliani extra muros extruitur ante an. 1431.

Monasterium Venetiarum tit. S. Justinae, quod antea erat Ordinis S. Birgittae an. 1450 traditur Sororibus Augustinianis.