LVI

DE TRANSLATIONE CORPORIS S. MATRIS MONICAE

 

 

 

 

Haec translatio ita celebratur in Aug. Martyrologio sub die 9 Aprilis: Romae translatio corporis S. Monicae bis matris S. P. Augustini, quod ex Ostia Tiberyna, ubi fere per mille et viginti annos jacuit in Ecclesia S. Aureae, agente Martino V Pontifice Maximo, Maphaejo Vegio Laudensi, B. Augustino de Roma Generali, et Sacrista Petro Assalbito Episcopo Electensi, et ven. Antonio de Fano Alphonsi V Aragoniae Regis confessario et legato ministrantibus in Urbem translatum est, et primo in Ecclesia S. Tryphonis collocatum multis erga aegrotos claruit prodigiis, et postea in templo S. P. Augustini maxima cum pompa repositum est.

Facta fuit hujusmodi translatio anno 1430 in Dominica Palmarum, quae tunc temporis incidit in diem 9 Aprilis, ut simul ambos, verba sunt praefati Martini V, Augustinum, et Monicam filii Augustini, filiique Monicae, Augustino in Italiam revocato religiosa pietate servarent. Idem Summus Pontifex ea occasione in templo S. P. Augustini publice analogum sermonem habuit, quem typis editum nostrates scriptores referunt. De hujusmodi S. Matris exuviarum translatione ita legitur apud nostratem Herreram tom. I sui Alph. Aug. pag. 382: Misit Deus in mentem cujusdam Joannae religiosissimae foeminae, quae nulli unquam nupta, caste et sancte per omnem aetatem suam, ad longos jam annos productam, ex proposito semper ita vixerat, ut persuaderet Fratribus Augustinensibus, qui Romae habitabant, solliciteque admodum et frequens rogabat eos ut corpus beatissimae Monicae, quod certo apud Ostia Tiberyna sub altari S. Aureae conditum esse a multis grandioribus natu, et majoribus suis saepe audierat, receptum, translatumque in urbem irent. Tandem visum est eis, qui regimen aliorum habebant, ne desiderium pudicissimae foeminae omnino negligerent. Itaque Pontificem adeunt, rem exponunt, rogant, supplicant. Suscipiensque eos, audiensque libenter Pontifex, annuit plene honestissimis eorum votis. Hac via, hoc ordine Deus piissimam matrem nepotibus, licet dormitantibus, sed ad foeminae vocem excitatis, restituit .... Deprompta sunt haec verba ex historia translationis S. Monicae Maphaei Vegii Datarii Martini V, quam noster Paulus Bergomensis typis evulgavit anno 1479.

Libet autem hic in medium proferre particulam sequentem decreti SS. Domini Papae Martini V emanati die 27 Aprilis an. 1430, quo praefatam reliquiarum S. Matris Monicae translationem ratam habuit, et confirmavit: Nuper siquidem, verba sunt laudati Summi Pontifìcis, Venerabili Fratri nostro Episcopo Electensi Apostolicae Capellae Sacristae, et Confessori nostro pro parte dilectorum filiorum Augustini de Roma Prioris Generalis, et universorum Fratrum Ordinis Eremitarum S. Augustini, cujus ipse Episcopus etiam professor existit, Nobis supplicante corpus Beatae Monicae Sancti Augustini Matris ex certis piis respectibus, et causis, praesertim quia corpus dicti Sancti ipsius Ordinis fundatoris, in quadam Ecclesia Papiensi dicti Ordinis venerabiliter reconditum existit, a loco civitatis nostrae Ostiensis, ubi sepultum et reconditum fuerat, ad Ecclesiam domus Fratrum dicti Ordinis de urbe transferendi et sepeliendi licentiam concessimus. Cujus concessionis auctoritate praedictum corpus in dicta Ecclesia debitis caeremoniis, condigna reverentia die nona Aprilis, quae fuit Dominica Palmarum, translatum et reconditum extitit. Nos itaque Episcopi, Prioris, et fratrum praedictorum devotionem, hujusmodi religiosis personis convenientem approbantes atque considerantes quod ob translationem praedictam de sanctitate hujusmodi corporis major apud Christifideles notitia haberi potest, quam si in quovis loco reconditum fuisset, translationem, et repositionem hujusmodi ratas habentes et gratas, eas ex certa scientia, Apostolica auctonitate tenore praesentium confirmamus etc. De hac translatione habetur in Ordinis Breviario sacrum, propriumque officium ad praefatum diem 9 Aprilis.