LVII

RES ORDINIS VARIE AB ANNO 1400 AD 1450

 

 

 

 

Bonifacius IX per Bullam Apostolicam emanatam die 8 Novembris an. 1401 concedit quod perpetuis futuris temporibus tam Generali, quam cuilibet Provinciali Ordinis Fratrum Eremitarum S. Augustini secundum morem, et instituta ejusdem Ordinis, in quibuscumque provinciis constitutis, tam praesentibus, quam futuris sit licitum ac permissum quascumque mulieres (si alias sit idoneae, et aliquod impedimentum canonicum non obsistat) quae habitum regularem praedicti Ordinis, ad instar Mantellatarum seu Pinzocherarum Ordinum Fratrum Minorum ac Praedicatorum, habere voluerint, et gestare, tam virgines, et matronas, quam viduas, in Mantellatas, seu Pinzocheras dicti ordinis Eremitarum recipere, et admittere, ac earum singulis habitum regularem, ac regulam ejusdem Ordinis Eremitarum, ad instar hujusmodi Mantellatarum, seu Pinzocherarum Ordinum Fratrum Minorum, ac Praedicatorum praefatorum, prout secundum Deum saluti animarum earumdem visum fuerit salubrius expedire, etiam exhibere etc ....

An. 1400 in Capitulo gen. Aquilae in diebus Pentecostes celebrato inter alia definitum fuit quod quando dicitur Te Deum laudamus omnes Fratres inclinant se in versu Te ergo quaesumus tuis famulis subveni etc. quemadmodum inclinant se in Credo ad incarnatus est etc. Item statutum fuit quod quaelibet provincia Ordinis pro subsidio expensarum factarum, et faciendarum pro libertate, et manutentione sacri conventus Beatissimi Patris nostri Augustini de Papia solvat ducatos sex quolibet anno ipsius triennii immediate sequentis…