LXV

DE INSTITUTIONE CONFRATERNITATIS S. CINCTURAE B. MARIAE VIRGINIS

 

 

 

 

Narrant nostrates scriptores aliique externi, quod piissima D. P. Augustini mater S. Monica cum summo dolore afficeretur tum propter mortem Patritii viri sui, quem suis precibus in ipso vitae illius termino ad Christum converterat, tum multo magis propter diuturnas filii Augustini aberrationes, recursum habuit ad Deiparam Virginem consolationum matrem, illam exorans ut ipsi afferret levamen atque solatium in suis tribulationibus, atque angustiis, simulque ei ostenderet quo modo induta incedere deberet toto suae viduitatis tempore. Quamobrem statim Sanctissima Virgo illi apparens nigro indumento ornata, atque zona pellicea renibus accincta sic eam affatur: Filia haec sit forma vestimentorum tuorum, atque interdum detractam sibi zonam pelliceam eidem Monicae tradens dixit: Accipe, hoc est gratum signum amoris mei, hoc cingulum consecratum hoc sinu, qui Deum continebat, hoc abhinc in posterum circumdet lumbos tuos absque eo quod umquam illud dimittas. Hinc factum est quod D. Ambrosius S. P. Augustinum in suo baptismate cuculla nigra induerit, atque cingulo ex corio praecinxerit; evaserat enim Monicae filius maternae pietatis imitator.

Ex eo autem tempore numquam in Augustiniana Religione erga sacram Deiparae cincturam devotio cessavit; eamque omnes fere Summi Pontifices plurimis indulgentiis cumularunt, quos inter Eugenius IV suo Apostolico Decreto emanato die 14 Augusti an. 1439, quod incipit: Solet Pastoralis Sedes, facultatem fecit Ordini Eremitarum S. P. Augustini instituendi sodalitia utriusque sexus fidelium sub titulo Cincturatorum Beatae Mariae Virginis, eisdem concedens magnam indulgentiarum copiam. Quamobrem eodem ipso anno Patres Augustinenses in sua S. Jacobi Bononiensi Ecclesia canonice instituerunt primam, atque semper celebrem Archiconfraternitatem S. Cincturae Sancti Patris Augustini, et Sanctae Matris Monicae et postea, anno scilicet 1495 aliam similem Confraternitatem fundarunt sub invocatione B. Virginis Matris Consolationis, quam Gregorius XIII sua pontificia Bulla Ad ea ex paternae charitatis etc., data sub die 15 Junii an. 1575 confirmavit, eamque priori univit per reciprocam privilegiorum communicationem.

Idem Summus Pontifex vigore sui Apostolici Brevis Curandum anno 1576 concessit facultatem aggregandi Confraternitati saerae Cincturae quamcumque aliam Confraternitatem, quae hujusmodi unionem postulare vellet, et alio Brevi Volentes emanato sub die 12 Novembris an. 1579 statuit ut aggregationis diplomata non expediantur nisi a Supremo Moderatore Ordinis Eremitarum S. Augustini pro tempore existente. Haec Cincturatorum Confraternitas innumeris gaudet indulgentiis, quarum Summarium recognitum atque correctum studio atque diligentia nostratis P. Mag. Assistentis Fr. Thomae Mariae Martinelli, nunc S. R. E. Cardinalis, iterum approbatum fuit a fel. rec. Pio Papa IX decreto Apostolico 7 Maji 1863.